Mitembeyan Deui
Ku: Iwan Setiawan
Peuting ieu kuring mitembeyan deui
geusan mapayan ugering carita
nu kungsi katulis atawa henteu pisan
Hayang deui nembrakkeun
rupaning sajak nu endah
pikeun ngawakilan peuting
nu beunghar ku sulintang
ngan geuning
asa teu timu
najan tibang kalangkang
Da kecap atuh loba teu kapirosea
ngolembar apay-apayan
pamuntangan lawas teuing leupas
tina implengan
diri bati hayang
pangabisa, duh ka mana boa!
da kecap teu deui peurahan
hayang mitembeyan
rumpak jami kucap-kecap
tapi mani hese ngucap
Tatar Kulon, Januari 2009
Sajak Taun Baruan
tangkal nu nyemprung lebah sepion
boa pananggalan nu racleng na kalamangsa
hiji-hiji katenjo belegedegna
aya nu dedeg atawa ngelekeceng
galo dina heuheuy jeung deudeuh lalampahan
tujuan, ah, naha enya pangharepan?
hanas kapan geus ngagupay ka bentang
da sugan kembang api anu pesta baris lana
horeng belesat jeung buricakna
ukur sakedapan, sakedapan
sabot ambekan nahan renghapan
tapi kapan hirup teh harepan, ceuk anjeun
enya sugan, mun harepanna hirup!
ah, mending angger neuteup bulan
hiji ge kapan tuhu nembongan
Baros, taun anyar 2009