Sajak-sajak Nazaruddin Azhar
Sabot Tepung
sanggeus sakabehna kedal
jadi arak nu mudal tina gelasna
nu tinggal saukur botol nu harapa dina dada
musik nu milu ngusikkeun kasono urang
teu kungsi nepungkeun
naon nu keur dipimelang
ukur simpe nu demit
seseleket dina kesetan biola
lir wawakil hiji sora
nu leungit tina wirahma
2006
Kasuwung
manehna terus miharep aya nu ngaliwat
tur nyimpangkeun imutna. Padahal cikeneh teh pamit
tapi, ke lanan, pokna terus melong deui umpalan halimun
nu bedah tina saban juru taun. Taya sasaha. Malah angin
nu sok nyalingker dina sesela pager, pan angger taya jirimna
bari nahan kahanjelu sanggeus saban peuting nyaring
manehna terus mulang kana urat panon kuring
ayeuna nya kuring nu panasaran, mindeng nyebutkeun ke lanan
bari nenjokeun kasuwung nu geus neureuy sakur jalan
2005
Sora
pasemon nu ngaboehrarang melong kakosong
di satukangeun tulang iga. Jangjang simpe ngeleper
kakubeng guruwung dada. Aya rasa nu ngeprulkeun karahana
aya manuk ngelak ti hiji munara sora. Walungan-walungan anyar
mubus kana lipetan waktu sabot sakabeh seahna
ngelun jadi saab nu kulawu
di darmaga pangimpungan sakur kalangkang
mangrebu lagu nu kungsi kahariringkeun
ukur jadi sapada nu kabaca dina urat angin tineung
peuting ngalambak gumulung, nyeblokkeun teuteupan anjeun
kana patelakna sora nu nolak jeung ngabaeukeun
2005
Blame It On The Moon: Katie Melua
kebul dina ukiran
geus jadi bagian tina panto
tempat kuring lar sup ka ieu rohangan
jarum jam geus lila ngarandeg
dina angka nu geus teu boga harti nanaon
memang taya nu salah
tina cuaca nu saban poe robah
kota tempat jalma-jalma nyacapkeun kapanasaran
ukur bagian tina wayah, tempat rasa balabuh
samemeh dijurung incah ku rasa bosen
tapi di dieu, satemenna ukur kuring sorangan
jeung buku-buku nu ambacak
sapanjang hujan jeung cangrana bulan
nu mawa mongkleng
tina kalimah-kalimah kandeg
nu mawa caang dina puisi nu mere jalan
pikeun sakur detik nu nyimpang sakedapan
2008