Kesting
Ku Dhipa Galuh Purba
I
Tingalabring ngadu ginding seja milu kesting. Geus dibuka
kesting keur peran bupati, walikota, gubernur, malah presiden.
Saban production house keur meujeuhna ngabutuhkeun aktor atawa aktris
nu sanggup merankeun tangtungan pamingpin pilih tanding.
Menejer kesting ngahunang-ngahening bari ngahariring sanggeus rea
calon aktor nu mere motor, sanggeus pesak merekis pamahanan calon aktris.
Geus ngabarak beungeut-beungeut calon nu isuk jaganing geto
bakal merankeun bupati, walikota, gubernur, malah presiden.
Beungeut-beungeut seja diajen. Geus tradisi nu ngabeusi yen pangaweruh ekting
lain perkara nu penting. Lantaran nu lalajo teu butuheun kamampuh ekting.
Nu lalajo hanaang ku nu kasep jeung geulis tur seksi, nu betah ditaranjangan
ku mata panon.
Nu lalajo butuh hiburan keur ngabeberah manah jeung nyengker amarah
lantaran motahna rega BBM, mahalna sakola, jeung mahalna digawe. Nu lalajo
ngancik di nagri sing sarwa awis kajaba ajen diri.
Kumaha peserta kesting nu angkaribung barang-jingjing?
His, puguh we kudu kasaring najan rada teu eling atawa langlang-lingling.
Nu penting kudu hobi curaling. Haling, haling... peserta kesting nu cadu
pulang-paling!
II
Calon aktor jeung aktris ti saban production house geus tatahar midang. Naskah
skenario geus apal cangkem. Gesat-gesut panata mik-ap, kostum, artistik, lampu,
jeung salian ti eta.
Kameramen ngeker sakolebat potret kahirupan sandiwara nu bakal jadi realita, atawa
realita nu bakal jadi sandiwara.
Sutradara geus ceuceuleuweungan, "Eksen! Kat! Goblooog! Sing baleg siah ekting
bupati teh! Piraku ekting walikota kitu patut! Begug atawa henteu merankeun gubernur?!
Teu pantes siah jadi presiden!" kitu diantara hahaokna sutradara. "Omat sing bisa
ngayakinkeun nu lalajo ngarah dipikaresep. Ajak ngimpi nu lalajo! Engke, mun geus
sukses medar ieu lalakon, urang nyieun deui carita anyar. Maraneh bakal dibere
peran jadi badog, bangsat, rampog, begal, koruptor, atawa naon bae
sakahayang maraneh!" pokna deui sutradara.
Calon aktor jeung aktris arunggeuk unggut-unggutan, aya oge nu bari lelenggutan.
"Siap jadi pamaen profesional! Merankeun bupati jadi, merankeun walikota okay,
merankeun gubernur hayu, merankeun presiden enteng! Komo deui merankeun badog, rampog, begal, atawa koruptor!" saur manuk sakur calon aktor jeung aktris nu siap
ekting.
Ranggon Panyileukan, Juli 2008