Mulang ti Gedong Erasmus Huis
Pabeubeurang Sudjana mulang ti Gedong Erasmus Huis di Jakarta, ngahadiran acara Pamasrahan Hadiah Sastra Rancage. Ti rohang pabukon nu eusina karereaan buku basa Walanda, manehna mawa sababaraha brosur. Breh, hiji brosur ti Guthe Istitute nu eusina netelakeun kagiatan kuliah umum (studium generale) nu mayeng diayakeun saban dua bulan sakali, dimimitian bulan Pebruari kamari. Jejerna museur kana visi filsafat ngeunaan masalah-masalah kota (Philosophy in the City). Upamana wae kuliah kahiji ngeunaan " Kota dan Kerja " ku Dr. Franz Magnis Soeseno, kuliah kadua, "Kota dan Budaya" ku Prof. Dr. Fx. Mudji Sutrisno, kuliah katilu, "Kota dan Kata" ku Dr. Francisco Budi Hardiman, kuliah kaopat "Kota dan Harta" ku Dr. B. Herry Priyono jeung kuliah kalima, "Kota dan Alam" ku Dr. Karlina Supeli. Kagiatan bieu teh upaya gawe bareng antara Goethe Institut Jakarta jeung Sekolah Tinggi Filsafat (STF) Driyarkara sarta bisa diiluan ku masarakat umum.
Ras Sudjana inget deui kana ucapan Wing Kardjo, almarhum, bareto basa ngobrol duaan di imah dulurna di Bandung. Ceuk eta doktor sastra lulusan hiji paguron luhur di kota Paris teh, cenah ayeuna mah kaom filsuf di Perancis teu beda jeung dokter atawa psikiater, sarua wae muka praktek keur umum. Hartina maranehna teu saukur "merenung" sorangan, ngayakeun refleksi wungkul, tapi aktip matalikeun pangaweruhna jeung masalah-masalah masarakat. "Bisa jadi kaom filsuf nu ngariung di STF Driyarkara oge meureun ka dinya. Maranehna geuning teu saukur mere kuliah keur mahasiswa wungkul, tapi nyesakeun waktuna pikeun praktek, muka kuliah umum keur masarakat" kitu gerentes hate Sudjana nu pasemonna ngadadak marahmay. Atoh meureun, pedah kaom cendekiawan geus turun ti "munara gading" ancrub milu meuraykeun masalah-masalah masarakat nu kiwari keur sakitu pajeujeutna.
Mawa Obor ka Pasar.
Dua hal nu bisa kacatet tina polah STF Driyarkara teh. Kahiji, eta paguron luhur filsafat geus nyontoan, para dosenna, sasatna kaom cendekiawan, teu saukur sugema ngajarkeun elmuna ka mahasiswa wungkul, polah minangka "guru di balik tembok kelas". Tapi, tuluy ancrub oge ka masarakat, muka kuliah umum keur balarea. Polah minangka "guru di bawah terik matahari". Kadua, kuliah umum bieu teh mayeng diayakeun saban dua bulan sakali, hartina teu sporadis, ancal-ancalan. Nya, kagiatan mayeng kitu apan nu arang langka dilakukeun ku masarakat urang teh. Karereanana apan kakapeungan wungkul, leuwih ti kitu reremenna saukur ritual, henteu substansial deuih.
Kapikir ku Sudjana, pola kagiatan saperti kitu bisa diupayakeun nerekab di saban tempat. Paguron luhur apan geus dug-deg di ditu dieu, kitu deui LSM ceuyah di mana-mana. Tah, apan paguron luhur jeung LSM pohara hadena babarengan ngatik masarakat nu sasatna ayeuna aya keneh dina tahapan jaman peteng. Saperti kacaritakeun, hiji filsuf Yunani baheula nu cenah sok mawa obor ka tengah pasar, tah, teu beda jeung kitu pancen kaom terpelajar ayeuna teh.
Memang, naratas polah ngarobah masarakat nu kaayanana saperti kiwari kudu dijalankeun kalayan leukeun. Paguron luhur saperti STF Driyarkara geus ngamimitian, kitu deui lembaga kabudayaan saperti Yayasan Rancage nu sakitu hese capena "mencerahkan" masarakat Sunda nu sakitu jauh katinggaleunana ku batur.
Sakeclak cai di gurun sahara.
Lian ti ngahurungkeun intelektualitas masarakat, saperti ngayakeun kuliah umum keur balarea, pohara pentingna oge apan ngangkat apresiasi masarakat kana karya kamanusaan nu luhur ajenna. Sarua ieu oge perlu dijalankeun kalayan mayeng tur perlu nerekab ka saban kota, ulah ngan saukur di Jakarta wungkul.
Kabandungan ku Sudjana, samemeh acara Yayasan Rancage lumangsung, minangka pamirig, dibuka heula harita teh ku kawih jeung tembang ti grup Gentra Madya. "Saperti sakeclak cai di gurun sahara" gerentes hatena. Iraha atuh aya pagelaran saperti kitu bisa mayeng kalalajoan ku masarakat umum?Buktina, kota Bandung, nu ti jaman Walikota Pa Djukardi geus ngadeklarasikeun minangka kota kabudayaan, apan iraha pagelaran kasenian bisa dilalajoan ku umum kalayan mayeng?
"Jigana, hal saperti kitu kudu dirobah, didobrak. Kaom filsuf, seniman jeung kaom cendekiawan umumna perlu babarengan kuriak ngarobah kaayaan. Tina kaayaan nu peteng robah jadi cangra"pikir Sudjana nu teu karasa mobil geus nepi ka Bandung wanci tengah peuting.
Karno Kartadibrata.