Demi Beja Ieu Sajak Ditulis
demi beja ieu sajak ditulis
sakumaha nu dicaritakeun ku hiji lalaki
basa angin meulit lamunan
kasangtukang nu teu dipisuka
ibarat panyiksa teu suda muka tatu anyar
ngungkab bebeneran liwat bebeneran
kawasna ieu hate
beuki leutik alahbatan zarah
ceuk ieu lalaki nu nampik munikeun mikir
ti jauhna rentang-rentang bandera ngelebet
bodas mapakan umpalan mega
luhureun ombak dikerabkeun gurat aran
dina wangun kalimah wening
teu singna lambaran simpe
dalah ieu lalaki kalah juuh cimata
peurih alahbatan dikeset hinis
demi beja ieu sajak ditulis
sakumaha dicaritakeun deui ku hiji lalaki
Panyingkiran, 2006
Catetan Redaksi:
Sajak nu ayeuna kapidangkeun teu kapaluruh saha nu nyeratna. Ku kituna, nu nyeratna mugi ngawartosan ka redaksi.
Komentar ti Para Mitra
Supados Mitra tiasa masihan komentar, mangga Login heulaAsikin Hidayat ngomentaran:
Ieu sajak beunang nulis kuring, dikirim langsung ka Mangle, nanging kawasna kertas naskahna bacacar, misah tina beundeulana dugi ka teu kapaluruh nu ngarangna. Ku kuring ieu sajak dimuat dina buku kum[ulan sajak kuring : DI WATES LANGIT (2011) dina kaca 69. Mugi kauninga.